Kutafuta pesa na kutengeneza pesa yote ni mifumo ambayo inakuletea kipato. Mitego ya kutega pesa inaitwa vitega uchumi. Wahenga wanazo akili nyingi waligundua mapema wakakwepesha maneno, badala ya kusema vitega pesa wakasema vitega uchumi. Hata hivyo haileti maana kusema vitega uchumi kwa sababu neno uchumi ni pana mno sidhani kama unaweza kuutega uchumi, lakini pesa zinategeka. 

Mitego ya kutega pesa ni miradi ambayo inakuingizia kipato bila ya wewe kuhusika moja kwa moja katika nafasi ya ufanyakazi. Kumbuka sifa ya mitego mtegaji hutega kisha huondoka zake atakuja baadaye kuona kama mtego wake umenasa pesa kisha huzichukua pesa kiulaini japokuwa zina mabawa.