Address
304 North Cardinal St.
Dorchester Center, MA 02124
Work Hours
Monday to Friday: 7AM - 7PM
Weekend: 10AM - 5PM
Katika maisha ya kila siku, watu wengi wanafukuzana na pesa kana kwamba pesa inaweza kushikwa kwa mikono. Wanaamka alfajiri, wanahangaika mchana kutwa, wanarudi usiku wakiwa wamechoka, halafu kesho wanaanza tena safari ile ile ya kuikimbiza pesa. Lakini Biblia inatoa onyo kubwa sana kuhusu tabia hii.
Katika Biblia Takatifu, kitabu cha Mithali 23:5 kinasema:
“Je, watazama macho yako juu ya mali isiyokuwapo? Maana yakini hujifanyia mabawa; kama tai huruka kuelekea mbinguni.”
Hii ni lugha ya picha yenye maana nzito sana. Biblia inatuonyesha kwamba pesa ina mabawa. Inaweza kuondoka haraka. Leo unayo, kesho huioni. Leo biashara inaenda vizuri, kesho soko linabadilika. Leo una nguvu za kufanya kazi, kesho afya inaweza kubadilika. Hivyo, mtu anayekimbiza pesa kila siku bila kujenga mfumo wa kuizalisha, anakuwa kama mtu anayekimbiza ndege angani.
Pesa Ikikimbizwa Sana Hupoteza Uhuru wa Maisha
Watu wengi wamegeuza maisha kuwa mbio za kudumu za kutafuta pesa. Hawana muda wa familia, hawana muda wa kupumzika, hawana muda wa kufikiri kuhusu maisha yao ya baadaye. Sababu kubwa ni kwamba mapato yao yanategemea uwepo wao wa kila siku.
Usipoenda kazini, hakuna pesa.
Usipofungua biashara, hakuna mapato.
Ukiumwa, kila kitu kinasimama.
Hayo siyo maisha ya uhuru wa kifedha. Huo ni mfumo wa kuibeba pesa mgongoni kila siku.
Suluhisho ni Kujenga Vitega Uchumi
Njia bora ya kukabiliana na “pesa yenye mabawa” siyo kuikimbiza zaidi, bali ni kujenga vitega uchumi vitakavyoikamata pesa hata ukiwa haupo.
Kitega uchumi ni mfumo unaoendelea kuzalisha mapato hata kama mwenyewe hayupo muda wote. Hapa ndipo watu wengi wenye mafanikio hutofautiana na wengine.
Mtu anaweza:
- Kufungua fremu ya biashara yenye wafanyakazi
- Kuanzisha mashamba yanayoingiza mapato kila msimu
- Kujenga nyumba za kupangisha
- Kuanzisha kampuni inayoweza kujiendesha
- Kutengeneza bidhaa za kidigitali
- Kuanzisha chaneli ya YouTube
- Kuandika vitabu
- Kuwekeza kwenye hisa au miradi mingine ya muda mrefu
Katika mfumo huu, mtu anatengeneza “mtego” wa pesa. Badala ya kukimbizana nayo kila siku, pesa yenyewe inaanza kumfuata.
Tajiri wa Kweli Hachoshwi na Kazi Ndogo Ndogo Kila Dakika
Moja ya siri kubwa za watu waliofanikiwa kifedha ni kwamba walitumia muda mwingi kujenga mifumo, siyo kujenga uchovu.
Kuna tofauti kubwa kati ya:
- kufanya kazi kwa pesa
na - kufanya pesa zikufanyie kazi.
Maskini wengi hufanya kazi kwa pesa maisha yao yote. Lakini watu wenye maono hujenga vitega uchumi vinavyofanya kazi kwa ajili yao.
Ndiyo maana unaweza kuona mtu amelala lakini biashara zake zinaingiza fedha. Mwingine yuko safarini lakini nyumba zake zinakusanya kodi. Mwingine anaendelea na shughuli nyingine lakini video zake mtandaoni zinaendelea kuingiza mapato kila siku.
Huo ndiyo uwezo wa vitega uchumi.
Usitumie Nguvu Zako Zote Kukimbiza Pesa
Kama pesa ina mabawa, basi usitumie maisha yako yote kuikimbiza. Tumia akili, maarifa, na muda wako kujenga mfumo utakaoinasa pesa hiyo.
Jiulize:
- Nikiumwa leo, mapato yangu yataendelea?
- Nisipoonekana kazini kwa mwezi mmoja, kuna kitu kitaingiza pesa?
- Nimejenga nini kitakachoendelea kuzaa mapato miaka ijayo?
Maswali haya ndiyo mwanzo wa uhuru wa kifedha.
Hitimisho
Mithali 23:5 haituambii kuchukia pesa. Inatufundisha kutokuitegemea pesa ya mikononi pekee. Pesa ni ya muda, inaweza kuruka kama tai. Lakini mtu mwenye hekima hujenga vitega uchumi vinavyoendelea kumletea mapato hata wakati hayupo.
Usiishi maisha ya kuikimbiza pesa kila siku kana kwamba haina mabawa.
Jenga vitega uchumi.
Jenga mifumo.
Jenga vyanzo vya passive income.
Kwa sababu pesa ina mabawa — lakini vitega uchumi vinaweza kuikamata.